ابداعات

“تخيل لو” قصيدة بقلم: وسام محمد عبده

بقلم: وسام محمد عبده



تخيل لو بقيت إنسان
بتتصرف بطيبة قلب
وترجع تاني زي زمان
ولو ضاقت تقوله يا رب
تقويني على الأحزان
وقلبي يبقى مليان حب
تخيل لو بسرعة تتوب
وعلى ذنبك تكون ندمان
وتدارى في وسط قلوب
بتشبه قلبك العشمان
تخيل لو تعيش راضي
وصابر ع اللي مكتوبلك
وماتضيعش ع الفاضي
في عمر بيجري محسوبلك
تخيل لو تكون حاسس
بنعمة ربنا وعدله
وعلى همك تكون دايس
وتحمد ربنا لفضله
تخيل آية م القرآن
بتقراها سنين وسنين
وتتعلق كما الغرقان
وروحك فيك ترد آمين
تخيل جوه بطن الحوت
تكون مخنوق وبره الكون
تحس انك خلاص هتموت
وتنجى بحق كن فيكون

اترك تعليقاً

error: هذا المحتوى خاص بجريدة الموجز العربي وهو محمي حسب حقوق النشر وقد يتعرض ناسخ المحتوى للمسائلة القانونية
إغلاق