"هن" ملتقى الإبداع النسائي

سحابة وعدت

للشاعرة: علا قنديل

استسلمت خلاص للغربه
واتعودت على الترحال ؟
بعدك صبحت دنيتي صعبه
وأصعب قلة راحة البال
وانا هاستنى لحد ما ترجع
ما اتعودت على دا الحال
وانت مسافر شايل همك
زي غريب فى بلاد الله
تزرع خطوة فى كل طريقك
نفسك مرة تلاقي حياه
وبتتمنى تلاقي بدايتك
جوا طريق صح بتمشيه
واما اليأس يقرب منك
شمس إيمانك راح تمحيه
وانت معدى هناك فى الغربه
إحفظ كل ملامح فيا
واما تحس بعتمة ليلك
غمض عينك .. وانده ليا
حانسى العالم كله واجيلك
حتى أن كنت بعيد عن عيني
قلبي معاك عمال يدعيلك
قمري وشمسي ويومي أمسي
ياللي مافيش في الدنيا مثيلك
لو هاتفكر بس تشاور
تلقى نجوم الليل تضويلك
كل الصعب يهون قدامك
لما دعايه بس يجيلك
اصلب طولك وافرد ضهرك
دا اللى ما يكسر حايقويك
إرمى حمولك ع اللى خلقنا
واسعى يا عمري بعزم ما فيك
تلقى الغربة سحابة وعدت
مهما اشتدت .. هاتعديك
ربي بعونك .. وحده يصونك
وف خطاويك قادر يحميك.

 

اترك تعليقاً

error: هذا المحتوى خاص بجريدة الموجز العربي وهو محمي حسب حقوق النشر وقد يتعرض ناسخ المحتوى للمسائلة القانونية
إغلاق